"Ардус" футзал бўйича клублар ўртасидаги Осиё чемпионатининг учинчи баҳсда ҳам мағлубиятга учради ва гуруҳ босқичини сўнгги ўринни банд этиб, мусобақани тарк этадиган бўлди.

Бугунги баҳсда "Санойи Гити Пасанд" учрашув бошидаёқ ҳисобни очишди. Шундан кейин "Ардус" ташаббусни қўлга олди, аммо танаффусга ҳисобни тенглаштириш Баҳодир Аҳмедов шогирдларига насиб этмади.

Иккинчи бўлимда ҳам вазият ўзгармади. Ўйин тугашига 5 дақиқа қолганидан ардусчилар яна бешинчи ўйинчи тактикасига ўтишди ва 38-дақиқада Дилшод Раҳматов ҳисобни тенглаштиришга муваффақ бўлди. Шунга қарамай, "Ардус" ғалаба зарурлиги учун клубимиз дарвозабонсиз ўйнашда давом этди. Бир вазиятда ён чизиқдан тўпни тезлик билан ўйинга киритган футзалчиларимиз дарвозани ишғол қила олишмади. Эронлик дарвозабон ўз ўрнига қайтишга улгурмаганди, фақатгина ўйинчи уни бир амаллаб қайтаришга эришди.

Ўйин тугашига 30 сония қолганида форслар бош мураббийи тайм-аут олди ва ён чизиқдан тўп ўйинга киритилганидан кейин Рустам Умаров дарвозасига иккинчи гол киритилди.

"Чонбури Блувейв" клуби эса сўнгги турда "Ас-Садд"ни мағлуб этди ва гуруҳ ғолибига айланди. "В" гуруҳида Таиланда ва Эрон клублари ярим финал йўлланмасига эга бўлишди.