Тошкент вилоятининг Бўстонлиқ туманидаги “Аллюр” от спорти клубида от спорти бўйича мамлакат кубоги баҳслари бўлиб ўтди. Мазкур мусобақада юртимизнинг номдор чавандозлари билан бирга умидли ёш спортчилар ҳам ўз маҳоратларини намойиш этди.
Баландлиги 120 сантиметрлик тўсиқлардан сакраш бўйича ўтказилган мусобақада пойтахтлик чавандозлар – Оқил Собиржонов биринчи, Аъзам Толиббоев учинчи ўринни эгаллаган бўлса, самарқандлик Владимир Шмелев кумуш медални қўлга киритди.
Аъзам Толиббоев 125 сантиметр баландликдаги тўсиқлардан сакраш бўйича бўлиб ўтган баҳсларда олтин медалга сазовор бўлди. Иккинчи ва учинчи ўринларни пойтахтлик Нуржон Туёқбоев ва Тошкент вилояти вакили Исожон Содиқов эгаллади.
Баландлиги 130 ва 140 сантиметрлик тўсиқлардан сакраш мусобақаларида пойтахтлик чавандоз Хуршид Олимжонов бир йўла иккита олтин медалга сазовор бўлди. Қолган совринли ўринлар пойтахтлик Ғайрат Назаров, Мирзоҳид Мусаев, Искандар Йўлдошев ва самарқандлик Владимир Шмелевга насиб этди.