«Ал-Ҳилол»нинг қанот ҳимоячиси, айни дамда ижара асосида «Барселона»да тўп тепаётган Жоау Канселу бутунлай Каталония клубига ўтиши мумкин.

Diario SPORT нашри тарқатган маълумотга кўра, «Ал-Ҳилол» Канселу учун «Барселона»дан ўн миллион евро талаб қилмоқда, бироқ «кўк-анорранглилар» бу миқдордаги пулни тўлашга тайёр эмаслар. Томонлар ўртасидаги музокаралар шу ой давомида давом этади. Агар трансфер амалга ошса, Канселу «Барселона» билан икки йиллик ёки «1+1» схемаси бўйича шартнома имзолайди.

Қайд этиш жоизки, аввалроқ «Ал-Ҳилол» ҳимоячи учун 15 миллион евро сўраган эди, бироқ кейинчалик футболчининг нархини туширди.

Каталонияликлар 31 ёшли португалиялик футболчини шу йилнинг январь ойида ижарага олишган эди. Ўшандан бери у барча мусобақаларда 19 та учрашувда майдонга тушиб, битта гол урди ва тўртта голли узатмани амалга оширди.