АҚШ Президенти Дональд Трамп ЖЧ-2026 доирасидаги АҚШ ва Парагвай терма жамоалари ўртасидаги ўйин чиптаси учун 1000 доллар тўламаган бўлишини тан олди.

— Мен бу нархдан хабардор эмасдим. Албатта, у ерда бўлишни истардим, лекин очиғини айтсам, мен ҳам бу чипталар учун бунча пул тўламаган бўлардим, — деди Трамп New York Post нашрига берган интервьюсида.

Шу билан бирга, АҚШ Президенти турнирнинг тижорий муваффақиятини алоҳида қайд этди. Унинг сўзларига кўра, ҳозиргача 5 миллион дона чипта сотилган ва бу рекорд кўрсаткичдир. Бироқ Трамп нархларнинг баландлиги ўйинларни оддий мухлислар учун ташриф буюриб бўлмас даражага келтириб қўйишидан хавотир билдирди.

— Мен нархларни кўрганим йўқ, лекин кўриб чиқишим керак бўлади. Агар Куинс ва Бруклиндан келган одамлар ва Дональд Трампни яхши кўрадиганларнинг барчаси ўйинга бора олишмаса, мен бундан хафа бўламан. Аммо, шу билан бирга, бу ақл бовар қилмайдиган муваффақиятдир, — дея қўшимча қилди у.

Аввалроқ ФИФАнинг чипталарни қайта сотиш платформасида жаҳон чемпионати финали учун битта чипта нархи қарийб 2,3 миллион долларга чиққани ҳақида хабарлар тарқалган эди. ФИФА президенти Жанни Инфантино юқори нархларни Америка бозорининг ўзига хос хусусиятлари ва АҚШда чипталарни қайта сотишга рухсат берилгани билан изоҳлаган.

Апрель ойи бошида ФИФА турнирнинг 40 та ўйини учун чипта нархларини оширди. Финал учун энг қиммат чипталар нархи 8,7 минг доллардан 11 минг долларгача кўтарилди. New York Post маълумотларига кўра, Нью-Жерсидаги ҳал қилувчи баҳс учун чипталарнинг ўртача нархи тахминан 13 минг долларни ташкил этмоқда.

2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Турнирда илк бор 48 та терма жамоа иштирок этади.