Мадриднинг «Реал» клуби собиқ футболчиси Предраг Миятович Жозе Моуриньюнинг яна Мадридга қайтиши мумкинлиги ҳақидаги хабарларга муносабат билдирди. Аввалроқ ОАВда айни дамда «Бенфика»ни бошқараётган португалиялик мутахассис «қаймоқранглилар» устозига айланиши кутилаётгани ҳақида хабарлар тарқалган эди.
«У — кучли характерга эга инсон. Жамоа мана икки йилдирки ҳеч нарса юта олмаяпти, шунинг учун унга «қаттиқ қўл» билан ишлайдиган кимдир керак. Мадридликларга футболчилар томонидан максимал даражада ҳурмат қилинадиган мураббий зарур», — дея экспертнинг сўзларини келтирмоқда Cadena SER.
Эслатиб ўтамиз, айни дамда Альваро Арбелоа бошчилигидаги Мадрид жамоаси Испания чемпионати турнир жадвалида иккинчи ўринда бормоқда ва пешқадам «Барселона»дан 11 очкога ортда қолмоқда.
