МЛС мунтазам чемпионати доирасида кечган «Цинциннати» ва «Интер Майами» баҳсида меҳмонлар 5:3 ҳисобида ғалаба қозонишди. «Фламинголар» учрашувнинг иккинчи бўлими якунида рақиб дарвозасига учта тўп киритиб, муҳим очколарни қўлга киритишди.

Майами клуби ҳужумчиси Лионель Месси учрашувдан сўнг ўз фикрлари билан ўртоқлашди.

«Меҳмондаги яна бир муҳим ғалаба», — деб ёзиб қолдирди 38 ёшли аргентиналик юлдуз ижтимоий тармоқдаги саҳифасида.

Таъкидлаш жоизки, Месси ушбу ўйинда дастлаб хет-трик ва битта голли узатма муаллифи сифатида қайд этилган эди. Бироқ учрашув якунланганидан сўнг, МЛС раҳбарияти Мессининг учинчи голини «Цинциннати» посбони Роман Челентано номига автогол сифатида қайта расмийлаштирди.

Айни дамда «Интер Майами» 13 ўйиндан сўнг 25 очко жамғариб, Шарқий конференцияда 2-ўринда бормоқда. «Цинциннати» эса 16 очко билан 8-поғонани эгаллаб турибди.