MLS muntazam chempionati doirasida kechgan «Sinsinnati» va «Inter Mayami» bahsida mehmonlar 5:3 hisobida g‘alaba qozonishdi. «Flamingolar» uchrashuvning ikkinchi bo‘limi yakunida raqib darvozasiga uchta to‘p kiritib, muhim ochkolarni qo‘lga kiritishdi.

Mayami klubi hujumchisi Lionel Messi uchrashuvdan so‘ng o‘z fikrlari bilan o‘rtoqlashdi.

«Mehmondagi yana bir muhim g‘alaba», — deb yozib qoldirdi 38 yoshli argentinalik yulduz ijtimoiy tarmoqdagi sahifasida.

Ta’kidlash joizki, Messi ushbu o‘yinda dastlab xet-trik va bitta golli uzatma muallifi sifatida qayd etilgan edi. Biroq uchrashuv yakunlanganidan so‘ng, MLS rahbariyati Messining uchinchi golini «Sinsinnati» posboni Roman Chelentano nomiga avtogol sifatida qayta rasmiylashtirdi.

Ayni damda «Inter Mayami» 13 o‘yindan so‘ng 25 ochko jamg‘arib, Sharqiy konferensiyada 2-o‘rinda bormoqda. «Sinsinnati» esa 16 ochko bilan 8-pog‘onani egallab turibdi.