АПЛ. «Астон Вилла» «Ливерпуль»ни мағлуб этиб, Чемпионлар лигаси йўлланмасини қўлга киритди (видеошарҳ)

Англия Премьер-лигаси 37-туридан ўрин олган «Астон Вилла» — «Ливерпуль» учрашуви якунланди. Бирмингемдаги «Вилла Парк» стадионида бўлиб ўтган баҳсда мезбонлар 4:2 ҳисобида ғалаба қозонди.

Учрашувда ҳисоб 42-дақиқада мезбонлар футболчиси Морган Рожерс томонидан очилди. 52-дақиқада Виржил ван Дейк ҳисобни тенглаштирди. Шундан сўнг Олли Уоткинс 57 ва 73-дақиқаларда гол уриб, дубль қайд этди. 89-дақиқада Жон Макгинн ҳисобни йирик кўринишга олиб келди. 90+2-дақиқада ван Дейк ўзининг иккинчи голини урди.

Ушбу ғалабадан кейин «Астон Вилла» очколарини 62 тага етказиб, турнир жадвалида тўртинчи ўринни эгаллади ва келаси мавсум УЕФА Чемпионлар лигасида иштирок этишни кафолатлади.

«Ливерпуль» эса 59 очко билан бешинчи ўринда қолди. Олтинчи поғонадаги «Борнмут» ҳисобида 55 очко мавжуд, аммо жамоа бу турдаги учрашувини ҳали ўтказмаган.

Аввалроқ «Арсенал», «Манчестер Сити» ва «Манчестер Юнайтед» ҳам Чемпионлар лигаси йўлланмасини расман қўлга киритган эди.

Кейинги турда «Астон Вилла» сафарда «Манчестер Сити» билан ўйнайди, «Ливерпуль» эса ўз майдонида «Брентфорд»ни қабул қилади. АПЛ 38-турининг барча учрашувлари 24 май куни бўлиб ўтади.

Англия — Премьер-лига, 37-тур
15 май 2026 йил. Бирмингем. «Вилла Парк» стадиони.
«Астон Вилла» — «Ливерпуль» 4:2
Голлар: Рожерс 42, ван Дейк 52, Уоткинс 57, 73, Макгинн 89, ван Дейк 90+2.