Angliya Premyer-ligasi 37-turidan o‘rin olgan «Aston Villa» — «Liverpul» uchrashuvi yakunlandi. Birmingemdagi «Villa Park» stadionida bo‘lib o‘tgan bahsda mezbonlar 4:2 hisobida g‘alaba qozondi.

Uchrashuvda hisob 42-daqiqada mezbonlar futbolchisi Morgan Rojers tomonidan ochildi. 52-daqiqada Virjil van Deyk hisobni tenglashtirdi. Shundan so‘ng Olli Uotkins 57 va 73-daqiqalarda gol urib, dubl qayd etdi. 89-daqiqada Jon Makginn hisobni yirik ko‘rinishga olib keldi. 90+2-daqiqada van Deyk o‘zining ikkinchi golini urdi.

Ushbu g‘alabadan keyin «Aston Villa» ochkolarini 62 taga yetkazib, turnir jadvalida to‘rtinchi o‘rinni egalladi va kelasi mavsum UYEFA Chempionlar ligasida ishtirok etishni kafolatladi.

«Liverpul» esa 59 ochko bilan beshinchi o‘rinda qoldi. Oltinchi pog‘onadagi «Bornmut» hisobida 55 ochko mavjud, ammo jamoa bu turdagi uchrashuvini hali o‘tkazmagan.

Avvalroq «Arsenal», «Manchester Siti» va «Manchester Yunayted» ham Chempionlar ligasi yo‘llanmasini rasman qo‘lga kiritgan edi.

Keyingi turda «Aston Villa» safarda «Manchester Siti» bilan o‘ynaydi, «Liverpul» esa o‘z maydonida «Brentford»ni qabul qiladi. APL 38-turining barcha uchrashuvlari 24 may kuni bo‘lib o‘tadi.

Angliya — Premyer-liga, 37-tur
15 may 2026 yil. Birmingem. «Villa Park» stadioni.
«Aston Villa» — «Liverpul» 4:2
Gollar: Rojers 42, van Deyk 52, Uotkins 57, 73, Makginn 89, van Deyk 90+2.