Аргентина терма жамоасининг собиқ ҳужумчиси Серхио Агуэро «Атлетико» ва «Барселона» ўртасида танлов қилиб, қайси клубга кўпроқ меҳр қўйганини айтди. Футболчи фаолияти давомида ҳар икки жамоа сафида ҳам тўп сурган.

«Мен “Атлетико” ва “Барселона”да ўйнаганман, аммо ҳақиқат шуки, мен “Барселона”ни чиндан ҳам яхши кўриб қолганман. Ҳозир мен “Атлетико”дан кўра кўпроқ “Барселона” мухлисиман.

Ростини айтсам, юрагим билан боғлиқ муаммолар бошланганидан кейин футболни унчалик кўп кузатмадим. Аммо Ламин Ямаль пайдо бўлгач, яна ўйинларни томоша қилиш истаги қайтди.

Менга Ямаль жуда ёқади ва айнан у туфайли яна футбол кўришни бошладим. У ёшлигида мен қила олмаган нарсаларни амалга оширмоқда», — деди Агуэро.

Эслатиб ўтамиз, Серхио Агуэро 2006–2011 йилларда «Атлетико» сафида тўп сурган. Аргентиналик ҳужумчи 2021 йилда «Барселона»га ўтган, аммо юрак билан боғлиқ муаммолар сабабли фаолиятини эрта якунлашга мажбур бўлган эди.