Argentina terma jamoasining sobiq hujumchisi Serxio Aguero «Atletiko» va «Barselona» o‘rtasida tanlov qilib, qaysi klubga ko‘proq mehr qo‘yganini aytdi. Futbolchi faoliyati davomida har ikki jamoa safida ham to‘p surgan.
«Men “Atletiko” va “Barselona”da o‘ynaganman, ammo haqiqat shuki, men “Barselona”ni chindan ham yaxshi ko‘rib qolganman. Hozir men “Atletiko”dan ko‘ra ko‘proq “Barselona” muxlisiman.
Rostini aytsam, yuragim bilan bog‘liq muammolar boshlanganidan keyin futbolni unchalik ko‘p kuzatmadim. Ammo Lamin Yamal paydo bo‘lgach, yana o‘yinlarni tomosha qilish istagi qaytdi.
Menga Yamal juda yoqadi va aynan u tufayli yana futbol ko‘rishni boshladim. U yoshligida men qila olmagan narsalarni amalga oshirmoqda», — dedi Aguero.
Eslatib o‘tamiz, Serxio Aguero 2006–2011 yillarda «Atletiko» safida to‘p surgan. Argentinalik hujumchi 2021 yilda «Barselona»ga o‘tgan, ammo yurak bilan bog‘liq muammolar sababli faoliyatini erta yakunlashga majbur bo‘lgan edi.













