Испанияда ҳужумчи Ҳамза Абделкаримнинг «Барселона»га ўтиш шартлари маълум қилинди. Каталония гранди 18 ёшли футболчини «Аль-Аҳли»дан 1,5 миллион еврога сотиб олди, бу ҳақда Қоҳира клуби матбуот хизмати аввалроқ хабар берган эди.
Mundo Deportivo нашрининг маълумотларига кўра, мисрлик футболчи «кўк-анорранглилар» билан 2029 йилнинг ўрталаригача мўлжалланган шартномага имзо чеккан. Яқин кунларда «Барселона» ҳам ушбу келишувни расман эълон қилади.
Ҳамза Абделкарим қишки трансфер ойнасида ижара асосида «Барса»га кўчиб ўтган эди. Ёш ҳужумчи каталонияликларнинг ёшлар жамоасида тўп тепди ва ўз ўйини билан клуб раҳбариятини қобилиятига ишонтира олди.
