Аргентина терма жамоаси ҳужумчиси Лионель Месси XXI асрда миллий жамоалар сафида энг кўп хет-трик қайд этган футболчига айланди. Бу ҳақда Transfermarkt маълум қилди.

ЖЧ-2026 гуруҳ босқичининг 1-турида Жазоирга қарши ўйинда (3:0) қайд этилган хет-трик Месси учун Аргентина терма жамоаси сафидаги 11-хет-трик бўлди.

Шу тариқа, аргентиналик юлдуз ушбу кўрсаткич бўйича якка пешқадамга айланди. Аввалроқ у Криштиану Роналду билан биринчи ўринни бўлишиб турган эди. Рейтингнинг учинчи поғонасидан эса БАА терма жамоаси ҳужумчиси Али Мабхут ўрин олган бўлиб, унинг ҳисобида 9 та хет-трик бор.

Жазоирга қарши учрашув Мессига жаҳон чемпионатлари тарихида яна бир рекордни тақдим этди. У 38 ёшу 358 кунлигида мундиаллар тарихидаги энг ёши катта хет-трик муаллифига айланди.

Бу борадаги аввалги рекорд Криштиану Роналдуга тегишли эди. Португалиялик юлдуз ЖЧ-2018да Испания дарвозасига учта гол киритганида 33 ёшу 130 кунлик бўлган.

Жаҳон чемпионатлари тарихидаги энг ёши катта хет-трик муаллифлари учлигига яна нидерландиялик Роб Ренсенбринк ҳам киради. У ЖЧ-1978да Эронга қарши баҳсда 30 ёшу 335 кунлигида хет-трик қайд этган эди.

Жаҳон чемпионатларидаги энг ёши катта хет-трик муаллифлари:

1. Лионель Месси — 38 ёш, 358 кун
2. Криштиану Роналду — 33 ёш, 130 кун
3. Роб Ренсенбринк — 30 ёш, 335 кун