Эрон терма жамоаси АҚШ расмийлари томонидан жамоа футболчиларининг мамлакат ҳудуди бўйлаб ҳаракатланиши чеклангани сабабли ФИФАга расмий шикоят йўллайди.
Мурожаатда кўрсатилишича, эронликларга Янги Зеландияга қарши баҳс учун АҚШга ўйин бошланишидан атиги бир кун олдин етиб келишга рухсат берилган, бу эса учрашувга бўлган тайёргарликнинг издан чиқишига олиб келган. Худди шундай ҳолат Бельгияга қарши иккинчи ўйин олдидан ҳам такрорланган.
«Эрон футбол федерацияси ушбу чекловларни барча иштирокчи жамоалар учун тенг шароитлар яратиш тамойилига зид деб ҳисоблайди ва бу тайёргарликка халақит бериши мумкин», — дейилади ташкилот баёнотида.
Маълумот учун, Эрон ва Янги Зеландия ўртасидаги баҳс 2:2 ҳисобидаги дуранг билан якунланган эди.
