Криштиану Роналду гуруҳ босқичи доирасида Колумбияга қарши кечган учрашувдан сўнг, XXI асрда Жаҳон чемпионатларида энг кўп офсайдга (ўйиндан ташқари ҳолатга) тушган футболчилар рўйхатида иккинчи ўринга кўтарилди.

Португалиялик ҳужумчи ушбу баҳсда икки бор ўйиндан ташқари ҳолатда қолиб кетди ва Жаҳон чемпионатларидаги фаолияти давомида бундай вазиятларнинг умумий сонини 23 тага етказди. У бу кўрсаткич бўйича Тьерри Анрини (22) ортда қолдирди ва айни дамда фақатгина Робин ван Персига (25) ютқазмоқда. Роналдуда ушбу «антирекорд»ни янгилаш учун камида яна битта ўйин бор.

Эслатиб ўтамиз, Колумбия билан учрашув голсиз дуранг билан якунланди. Португалия 1/16 финал йўлланмасини қўлга киритди ва унда Хорватияга қарши майдонга тушади.

Роналду учун мазкур Жаҳон чемпионати фаолиятидаги олтинчиси бўлди. У илк бор бундан 20 йил аввал Германияда ўтказилган турнирда иштирок этган эди.