Халқаро футбол ассоциациялари федерацияси (ФИФА) 2030 йилдан кейинги Жаҳон чемпионатлари тақвимини қайта кўриб чиқиш имкониятини муҳокама қилмоқда. Бунга сўнгги йилларда кузатилаётган кескин иссиқ ҳароратлар ва иқлим ўзгариши сабаб бўлмоқда.

RMC Sport хабарига кўра, ташкилот раҳбарияти мундиални ёз ойларида ўтказиш қанчалик мақбул эканини муҳокама қиляпти. Бунга АҚШ, Канада ва Мексикада ўтаётган ЖЧ–2026 давомида кузатилган ғайриоддий иссиқ об-ҳаво ҳамда иқлим ўзгаришининг мусобақаларга таъсири асосий сабаб сифатида келтирилмоқда.

Бунга яққол мисол сифатида ЖЧ–2026 1/8 финалидаги Франция — Парагвай учрашуви келтирилган. Филаделфияда бўлиб ўтадиган баҳс бошланиши арафасида ҳаво ҳарорати 38 даражагача кўтарилиши кутилмоқда. Шаҳарда экстремал иссиқлик бўйича расмий огоҳлантириш ҳам эълон қилинган. Бундай шароитда жамоалар машғулотларни ҳам ўтказишга мажбур бўлмоқда.

ФИФА 2030 йилдан кейин халқаро футбол тақвимини янада кенг қамровли ислоҳ қилиш масаласини ҳам муҳокама қилмоқда. Ташкилот фикрича, иқлим шароити сабаб 2022 йилги Қатар мундиалининг ноябрь—декабрь ойларига кўчирилиши ўзини оқлаган. Ўшанда кўплаб мутахассислар ва футбол вакиллари жамоаларнинг ўйин сифати ҳамда футболчиларнинг жисмоний ҳолатини юқори баҳолаган эди.

Шу билан бирга, Испания, Португалия ва Марокаш мезбонлик қиладиган Жаҳон чемпионати–2030 аввал тасдиқланган режага мувофиқ ёз фаслида ўтказилади. Бироқ ФИФА июнь ва июль ойларида, айниқса, Марракеш каби ҳарорат 40 даражадан ошиб кетиши мумкин бўлган шаҳарларда ўйинлар ташкил этиш жиддий саволларни келтириб чиқараётганини тан олмоқда.

Ташкилот таъкидлашича, муаммо фақат стадионлардаги шароит билан чекланмайди. Машғулот базалари, фан-зоналардаги мухлислар хавфсизлиги, ходимлар учун меҳнат шароитлари ва ўйинларнинг бошланиш вақти ҳам муҳим аҳамиятга эга.

ФИФА президенти Жанни Инфантино ҳам йирик мусобақаларни ўтказиш муддатларини қайта кўриб чиқиш эҳтимолини истисно этмаган. Манба маълумотига кўра, Саудия Арабистонида бўлиб ўтадиган Жаҳон чемпионати–2034 катта эҳтимол билан қиш фаслида ташкил этилади. Кейинги мундиалларнинг ёзги форматда ўтказилиши эса ФИФАнинг 2030 йилдан кейин қабул қиладиган қарорларига боғлиқ бўлади.