Португалия терма жамоаси ҳужумчиси Криштиану Роналду ЖЧ-2026нинг 1/16 финалида Хорватияга қарши кечган ва 2:1 ҳисобидаги ғалаба билан якунланган ўйиндан кейин ўз таассуротлари билан ўртоқлашди.

Учрашувнинг 53-дақиқасида хорватлар ҳисобни очишди, 68-дақиқада эса Роналду пенальтини аниқ амалга ошириб, таблодаги мувозанатни тиклади. 94-дақиқада Гонсалу Рамуш португалияликларга ғалаба келтирган гол муаллифига айланди.

«Бугун қийин бўлишини билардим. Сардор сифатида мен илгари ҳам бундай ҳолатларни бошдан кечирганман. Мен доим чидашни билиш кераклигини айтиб келганман. Бундай турнирда ғолиб чиқиш учун сабр қилиш ва азоб чека олиш лозим. Менимча, мухлислар учун бу жуда ёрқин томоша бўлди. Биринчи бўлимда ўйинни назорат қилдик, иккинчи бўлим эса бир оз тартибсизроқ кечди, аммо бу одатий ҳол.

Хорватия гол урганида биз издан чиқдик ва саросима пайдо бўлди, бироқ кейин пенальти ишлаб олдик, ҳисобни тенглаштирдик ва енгил тин олдик. Айнан шу вазиятдан сўнг руҳий жиҳатдан бизга анча осонлашди», — деди Роналду ўз интервьюсида.

Эндиликда 6 июль куни 1/8 финал босқичи доирасида Португалия ва Испания терма жамоалари ўртасидаги супертўқнашув бўлиб ўтади.