Индонезия президенти Прабово Субианто мамлакат миллий терма жамоасининг 2030 йилги жаҳон чемпионатига чиқишини умуммиллий вазифа сифатида белгилади.
Жакартада очилган Индонезия футбол ассоциацияси (PSSI) конгресси иштирокчиларига мурожаат қилган давлат раҳбари мамлакатнинг катта салоҳиятга эга эканини таъкидлади.
«Индонезия буюк мамлакат. Буюк мамлакатларнинг буюк орзулари ва уларни амалга оширишга жасорати бўлиши керак. Менимча, Индонезия 2030 йилги жаҳон чемпионатида иштирок этишга муносиб», — деди Субианто.
Президент Индонезия 2026 йилги жаҳон чемпионати йўлланмасига яқин келганини, аммо саралаш босқичида Саудия Арабистони ва Ироқ терма жамоаларига мағлуб бўлиб, мусобақадан четда қолганини эслатди.
Шу муносабат билан у PSSI раҳбариятига ЖЧ-2030га тайёргарлик бўйича комплекс дастур ишлаб чиқиш вазифасини юклатди. Мазкур режа мамлакат футболи ривожланишининг узоқ муддатли стратегиясига асос бўлиши лозим.
Субианто клублар, футбол академиялари, мураббийлар, футболчилар, мухлислар, маҳаллий ҳокимиятлар, бизнес вакиллари, оммавий ахборот воситалари ҳамда жамоатчиликни ягона мақсад йўлида бирлашишга чақирди.
«Бу буюк мақсадга фақат ҳукумат ёки PSSIнинг ўзи эриша олмайди. Бу — бутун миллатнинг вазифасидир», — деди Индонезия президенти.
Эслатиб ўтамиз, 2030 йилги жаҳон чемпионатига Испания, Португалия ва Марокаш мезбонлик қилади. Турнирнинг очилиш учрашувлари эса Жаҳон чемпионатининг 100 йиллиги муносабати билан Уругвай, Аргентина ва Парагвайда ўтказилади.
