Эроннинг “Истиқлол” жамоасида тўп тепаётган ўзбекистонлик футболчи Жалолиддин Машарипов 2-сентябрь, чоршанба куни бўладиган “Персеполис”га қарши баҳсда майдонга тушиши мумкин.

Машарипов 2026-йилнинг 1-январида “Сепахон”га қарши учрашувда (73-дақиқада захирадан майдонга тушиб, 90-дақиқада алмаштирилган) жароҳат олиб, 31-январ куни операция қилинган эди. Узоқ вақт ўйин амалиётисиз қолгани ҳамда индивидуал тикланиш жараёни чўзилгани сабабли у 2026-йилги Жаҳон чемпионатини ҳам ўтказиб юборди.

Ҳозирги вақтда Машарипов спорт формасини тиклаб, “Истиқлол”нинг умумий гуруҳ машғулотларига қўшилган. У Эрон чемпионатининг дастлабки учта ўйинида қайдномага киритилган бўлса-да, майдонга тушмаган эди. Футболчи 4-тур доирасидаги “Фулад”га қарши беллашувда эса умуман қайдномага киритилмади. Маҳаллий ОАВ хабарига кўра, мураббийлар штаби футболчини “Персеполис”га қарши ўйинга сақлаш мақсадида унга дам беришга қарор қилган.

Маълумот учун, Эрон чемпионатининг 5-туридан ўрин олган “Истиқлол” ҳамда “Персеполис” ўртасидаги учрашув 2-сентябрь, чоршанба куни Тошкент вақти билан 21:00 да Исфахондаги “Нақши Жаҳон” стадионида бошланади. Эътиборли томони шундаки, “Персеполис” сафида яна икки нафар ўзбекистонлик футболчи — Остон Ўрунов ва Игор Сергеев тўп тепади.