«Фулхэм» АПЛдаги дербида «Кристал Пэлас»га 2:3 ҳисобида мағлуб бўлди. «Дала ҳовли эгалари» учрашув давомида икки марта ҳисобда олдинга чиққан бўлса-да, устунликни сақлаб қола олмади. Ўйиндан сўнг жамоа бош мураббийи Альваро Арбелоа фикр билдирди.

«Биз мағлуб бўлишга лойиқ бўлмаган ўйинда ютқаздик. Менимча, майдондаги яхшироқ жамоа биз эдик, аммо футболда якунда ўз вазиятларингдан фойдаланиш керак. Рақиб бу борада биздан яхшироқ ҳаракат қилди.

Биз жуда осон голлар ўтказиб юбордик. «Кристал Пэлас»га учта гол уриш учун кўп нарса керак бўлмади. Биз эса гол уриш учун жуда кўп куч сарфладик.

Биз қайтган тўплар учун курашни ва айрим вазиятларда майдон бўйлаб ҳаддан ташқари кенг жойлашиб, катта бўшлиқлар қолдириб қўйишимизни назорат қилишимиз керак. Шу жиҳатларда яхшиланишимиз лозим.

Уч ўйинда учта мағлубият — бу оғир. Энди олдимизда «Энфилд»га сафар ва «Манчестер Юнайтед»га қарши уй учрашуви бор. Аммо бу ой жуда қийин бўлишини аввалдан билардик.

Мен футболчиларга бу ой бутун мавсумимизни белгилаб бермаслигини айтдим. Жамоа қаттиқ меҳнат қиляпти. Шундай муносабат ва характер билан ғалабалар албатта келишига ишонаман», — дея Арбелоанинг сўзларини «Фулхэм» расмий сайти келтирмоқда.

«Ливерпуль» — «Фулхэм» учрашуви 12 сентябрь куни бўлиб ўтади.