«Ал-Ҳилол» Саудия Арабистони футбол федерациясига «Ал-Таавун» мухлислари устидан расмий шикоят қилди. Миллий чемпионатнинг 7-туридаги «Ал-Таавун» — «Ал-Ҳилол» (0:6) учрашуви вақтида мезбонларнинг бир нечта мухлиси меҳмонлар ярим ҳимоячиси Рубен Невешни провокация қилиш мақсадида Диогу Жотанинг номини бақирган.

«Ал-Ҳилол» бундай ҳаракатларни кескин қоралайди, айниқса улар футболчилар ёки уларнинг оила аъзоларига дахл қилса ёки шахсий ҳақоратга қаратилган бўлса. Биз ўйиннинг барча иштирокчиларига ҳурмат ва қадр-қиммат сақланадиган спорт муҳитини яратиш зарурлигини таъкидлаймиз.

«Ал-Ҳилол» низомда белгиланган тартиб-таомилларни бошлади ва юз берган воқеа юзасидан Саудия Арабистони футбол федерациясига шикоят юборди. Бу орқали клуб ва футболчиларнинг ҳуқуқларини ҳимоя қилиш ҳамда бундай қоидабузарликлар амалдаги қоидалар асосида кўриб чиқилишини таъминлашни мақсад қилган», — дейилади клуб баёнотида.

Невеш ва Жота яқин дўст бўлган. Улар «Порту», «Вулверхэмптон» ва Португалия терма жамоасида бирга ўйнашган. Диогу Жота 2025 йил 3 июль куни 28 ёшида автомобиль ҳалокатида вафот этган. Жота билан бирга машинада унинг акаси Андре Силва ҳам бўлган.