«Эльче» клуби ярим ҳимоячи Гонсало Вильяр ва «Реал» ҳужумчиси Килиан Мбаппе ўртасидаги жанжалга муносабат билдирди.
«Реал» 3:2 ҳисобида олдинда бораётган пайтда Вильяр Мбаппени бўғзидан ушлаб олган. Франциялик футболчи эса рақибининг юзига бармоғини ўқталиб, уни қўпол сўзлар билан ҳақорат қилган.
Бош ҳакам Хесус Хиль Мансано спортга хос бўлмаган хатти-ҳаракат учун Вильярга сариқ карточка кўрсатди, Мбаппе эса жазосиз қолди.
Шундан сўнг «Эльче» ўзининг X ижтимоий тармоғидаги расмий саҳифасида Мбаппенинг Вильяр томон бармоқ ўқталиб, унга нимадир айтаётгани акс этган икки суратни эълон қилди. Бироқ клуб Вильярнинг Мбаппени бўғзидан ушлаган ҳолатини кўрсатмади.
Постга «Фэйр-плей» деган изоҳ қолдирилди.
Изоҳларда эса айрим фойдаланувчилар «Эльче» футболчиларининг ўйин давомидаги қўпол ҳаракатлари, шунингдек Вильярнинг Мбаппени бўғзидан ушлагани акс этган видеоларни жойлаштириб, уларни ҳам кинояли тарзда «фэйр-плей» деб аташди.
