«Реал»нинг Сеутадаги фан-клуби президенти Мигель Анхель Монтано жамоа футболчиларининг «Эльче»га қарши учрашув олдидан қилган ҳаракатлари ҳақида фикр билдирди.

Ла Лиганинг 6-туридан ўрин олган «Эльче» — «Реал» учрашуви олдидан икки жамоа футболчилари майдонга Todos somos Caballas ёзуви туширилган оқ футболкаларда чиқди. Испан тилидаги ушбу ибора сўзма-сўз «Барчамиз — скумбриямиз» деган маънони англатади, аммо маҳаллий контекстда «Барчамиз — Сеута аҳолисимиз» маъносида қўлланади. Caballas сўзи Сеутада туғилган ёки яшовчи аҳолига нисбатан ишлатиладиган халқона лақаб ҳисобланади.

Килиан Мбаппе, Ибраима Конате ва Винисиус Жуниор футболкани тўлиқ киймагани сабабли ундаги ёзув деярли кўринмай қолган. Кейинчалик Мбаппе ва Винисиус «Реал» футболчилари орасида футболкани биринчи бўлиб ечган.

Шунингдек, ижтимоий тармоқларда Винисиус Мбаппега футболкани Сеутани қўллаб-қувватловчи ёзув кўринмайдиган тарзда қандай кийиш мумкинлигини кўрсатаётган видео ҳам тарқалган.

Эслатиб ўтамиз, 30 июль куни Марокашдан 70 мингдан ортиқ мигрант Испаниянинг Сеута яримэксклави ҳудудига киришга уринган. Уларнинг катта қисми шаҳарда қолган, чегарани кесиб ўтишга уринишлар чоғида ўнлаб одам ҳалок бўлган.

«Биз кийиниш хонасидан олинган кадрларни кўриб, футболчилар шаҳримизни қўллаб-қувватловчи футболкаларни кийганини пайқадик ва бундан жуда хурсанд бўлдик.

Аммо кейин «Реал»нинг уч футболчиси футболкани кўтариб, ундаги ёзувни кўрсатмасликка ҳаракат қилганини кўрдик. Шунда биз: «Демак, қўллаб-қувватлаш йўқ экан», деб ўйладик. Бу бизга жуда оғир ботди, айниқса гап ўзимиз қўллаб-қувватлайдиган «Реал» футболчилари ҳақида кетаётгани учун.

Мен тушунганим бўйича, Мбаппе бизнинг вазиятимизга ҳамдард эканини, аммо шу билан бирга мигрантларни ҳам қўллаб-қувватлашини айтган. Айнан шу сабаб у футболкадаги ёзувни кўрсатмаган. Агар сенда Сеутани қўллаб-қувватловчи футболка бўлса, уни ечма. Эртага ёки кейинги ўйинда эса мигрантларни қўллаб-қувватловчи футболкани кий. Ҳаммаси жуда оддий.

Менимча, унинг узр сўраши яхши ҳолат. Хатони тан ола билиш — одоб ва инсоф белгиси. Кеча гап Сеута ҳақида эди, эртага эса, эҳтимол, мигрантларни қўллаб-қувватлаш навбати келар.

«Реал» бундай ҳолатлардан юқори туради. Клуб бу вазиятга муносабат билдиради ва, албатта, бизни қўллаб-қувватлайди. Бу шахсий танлов эди. Қарорни бутун жамоа эмас, айнан ўша уч футболчи қабул қилди», — деди Монтано La Tribu дастури эфирида.