«Лилль» президенти Оливье Летанг Франция чемпионатининг 2-туридан ўрин олган «ПСЖ»га қарши ўйиндан (2:2) кейинги номақбул хулқ-атвори учун 20 минг евро миқдорида жаримага тортилди. Бундай қарорни Профессионал футбол лигасининг интизом комиссияси қабул қилди. Функциянер дисквалификациядан қутулиб қолди.

Учрашув 28 август куни бўлиб ўтган эди. Парижликлар дастлаб эълон қилинган қўшиб берилган вақт тугаганидан сўнг, ўйин охирида ҳисобни тенглаштиришди, бу эса Летангнинг ҳакам Эрик Ваттелье ишидан кескин норозилигига сабаб бўлди. Ҳакамнинг қўшимча билдиришномасига кўра, финал хуштагидан сўнг «Лилль» президенти стадион йўлакларида «бу шармандалик» деб бақирган ва «ҳамма нарса ҳамиша бир хил» эканлигини айтган.

Ўйиндан сўнг Летанг Франция ҳакамлари раҳбари Антони Готьега бир нечта хабар ҳам юборган. Улардан бирида у: «Мен сизни огоҳлантирган эдим! Бу шармандалик!» деб ёзган. Кейинчалик функционер клуб Ваттельени ўз ўйинларида бошқа ҳакам сифатида кўришни хоҳламаслигини айтди ва у янги тайинлов олган тақдирда майдонга тушмаслик билан таҳдид қилди. Бундан сўнг Этика қўмитаси ишни лиганинг интизом комиссиясига топширди.

Летанг учун бу Ваттелье билан биринчи конфликт эмас. 2026 йилнинг январь ойида «Лилль» президенти «Ренн»га қарши ўйиндан (0:2) сўнг худди шу ҳакамга нисбатан қилган хатти-ҳаракати учун икки ойдан ортиқ вақтга дисквалификация қилинган эди. Бу сафар комиссия фақат пул жаримаси билан чекланди.