«Севилья» бош мураббийи Луис Гарсия Пласа «Барселона» ҳужумчиси Рафинья Диаснинг ўйинидан ҳайратда қолганини айтди.
Шанба куни каталонияликлар сардори «Рамон Санчес Писхуан» стадионида хет-трик қайд этиб, жамоасига 3:1 ҳисобидаги ғалабани келтирди.
«Футболда шундай нарсалар борки, мен уларни умуман тушуна олмайман. Қандай қилиб Рафинья «Олтин тўп» учун 30 нафар номзод қаторига кирмади?! Мен буни тушунмайман», — дея Луис Гарсия Пласанинг сўзларини журналист Фабрицио Романо келтирмоқда.
Мавсум бошидан буён Рафинья «энг яхши давридаги» Лионель Месси ва Криштиану Роналду даражасида сермаҳсуллик кўрсатмоқда. У мавсумнинг дастлабки саккизта ўйинида 14 та гол уриб, яна 3 та голли узатмани амалга оширди.
29 ёшли ҳужумчининг ўзи ҳам «Олтин тўп» номзодлари рўйхатига кирмаганини ноҳақ қарор деб ҳисобламоқда.
