"Бавария" президенти Герберт Хайнер Ламин Ямалнинг "Олтин тўп" ҳақидаги баёнотларига муносабат билдирди.

Аввалроқ "Барселона" вингери соврин энг кўп гол урган футболчига эмас, балки дунёнинг энг яхши ўйинчисига топширилиши кераклигини айтган эди. Шунингдек, 19 ёшли футболчи ўзини ва Килиан Мбаппени дунёнинг энг яхши икки футболчиси деб ҳисоблашини таъкидлаган.

"Бавария" ҳужумчиси Харри Кейн ўтган мавсумда голлар сони бўйича пешқадам бўлиб, "Олтин бутса"ни қўлга киритган. Англиялик футболчи Ямал сингари бу йилги "Олтин тўп"га ҳам номзод.

"Харри Кейн Бундеслига, Германия кубоги ва Чемпионлар лигасида жами 60 та гол урди. У Германия чемпиони бўлди, мамлакат кубогини қўлга киритди, Чемпионлар лигасида ярим финалгача етиб борди ва Жаҳон чемпионатини ҳам жуда яхши ўтказди. "Олтин тўп"ни ютиш учун яна нима қилиш кераклигини билмайман.

Ламин Ямал, шубҳасиз, жуда яхши футболчи ва унинг олдида катта келажак бор. Аммо ўтган мавсумдаги барча ҳолатларни ҳисобга олсак, фақат битта ғолиб бор — у ҳам бўлса Харри Кейн", — деди Хайнер.