Нидерландиялик ҳужумчи Мемфис Депай Бразилияда оғир даврни бошдан кечирмоқда. Яқинда у Аргентинанинг «Эстудиантес» клуби мухлисларига ўрта бармоғини кўрсатиб, можаро марказида қолган эди.
Жавоб учрашувида эса Депай пенальтидан фойдалана олмади ва шундан сўнг унинг клуби Кубок Либертадорес мусобақасини тарк этди. Бу воқеалардан кейин футболчи мухлислардан узр сўради.
«Юрагим парчаланмоқда. Мен барча танқидларни тушунаман ва қабул қиламан. Аммо жамоадошларим ва мухлислар билан бирга бу клубнинг янада буюк тарихини яратишдан ҳеч қачон тўхтамайман. Уни ўзи муносиб бўлган жойга қайтариш учун курашишда давом этаман.
Кубок Либертадоресда ғалаба қозониш ҳақидаги орзумизга ишонган барча мухлислар ва кўплаб инсонлардан узр сўрамоқчиман», — дея Депайнинг сўзларини derbyderbyderby.it келтиради.
Эслатиб ўтамиз, Депай 2024 йилдан бери Бразилияда тўп тепмоқда.
