Англия терма жамоаси бош мураббийи Томас Тухель жароҳатлар сабаб миллий жамоа йиғинларини тез-тез ўтказиб юбораётган Коул Палмердан норози эканини билдирди.

«У ҳозир ноқулайлик ва оғриқ билан ўйнаяпти, шунинг учун ўзининг энг юқори даражасини кўрсата олмаяпти. «Челси» бизга шу ҳақда маълум қилди.

Бу шунчаки «халқаро танаффус» эмас. Бу рақобат муҳити. Футболчилар бу ерда машғулот ўтказишни ва бирга бўлишни хоҳлайди. Биз айнан шундай муҳит яратдик ва бу масалада ҳеч қачон муроса қилмаймиз.

Футболчилар Англия терма жамоасига келишни истамайди, деган таассурот пайдо бўлишига йўл қўймаймиз. Биз ҳақиқатан ҳам Англия учун ўйнашни хоҳлайдиган футболчиларга таянамиз», — деди Тухель.

Палмер учун бу навбатдаги қўлдан бой берилган имкониятми, деган саволга мураббий шундай жавоб берди:

«Албатта. У жуда кўп имкониятларни қўлдан бой бермоқда. Жароҳатлар сабаб жуда кўп йиғинларда қатнашмаяпти.

Мен ўз жамоамда шахсан кўрган ва кузатган нарсаларимга таяниб қарор қабул қилмоқчиман. Бунинг учун эса футболчи терма жамоа қароргоҳида бўлиши керак», — деди Тухель.