Angliya terma jamoasi bosh murabbiyi Tomas Tuxel jarohatlar sabab milliy jamoa yig‘inlarini tez-tez o‘tkazib yuborayotgan Koul Palmerdan norozi ekanini bildirdi.

«U hozir noqulaylik va og‘riq bilan o‘ynayapti, shuning uchun o‘zining eng yuqori darajasini ko‘rsata olmayapti. «Chelsi» bizga shu haqda ma’lum qildi.

Bu shunchaki «xalqaro tanaffus» emas. Bu raqobat muhiti. Futbolchilar bu yerda mashg‘ulot o‘tkazishni va birga bo‘lishni xohlaydi. Biz aynan shunday muhit yaratdik va bu masalada hech qachon murosa qilmaymiz.

Futbolchilar Angliya terma jamoasiga kelishni istamaydi, degan taassurot paydo bo‘lishiga yo‘l qo‘ymaymiz. Biz haqiqatan ham Angliya uchun o‘ynashni xohlaydigan futbolchilarga tayanamiz», — dedi Tuxel.

Palmer uchun bu navbatdagi qo‘ldan boy berilgan imkoniyatmi, degan savolga murabbiy shunday javob berdi:

«Albatta. U juda ko‘p imkoniyatlarni qo‘ldan boy bermoqda. Jarohatlar sabab juda ko‘p yig‘inlarda qatnashmayapti.

Men o‘z jamoamda shaxsan ko‘rgan va kuzatgan narsalarimga tayanib qaror qabul qilmoqchiman. Buning uchun esa futbolchi terma jamoa qarorgohida bo‘lishi kerak», — dedi Tuxel.