Аргентина терма жамоаси бош мураббийи Лионель Скалони Лионель Мессисиз жамоа ўйини қандай қурилишини тушунтирди.

39 ёшли ҳужумчи халқаро фаолиятини якунлашини эълон қилди. 6 октябрь куни унинг терма жамоа сафидаги хайрлашув учрашуви бўлиб ўтади. Скалони эса ўз лавозимида қолишга қарор қилди ва Аргентина терма жамоаси билан шартномасини 2030 йилга қадар узайтирди.

«Гап фақат Мессининг майдонда нима қилаётгани ҳақида эмас, балки унинг майдон ташқарисидаги роли ҳақида ҳам кетмоқда. Унда мен бошқа ҳеч кимда кўрмаган фазилатлар бор. Уни алмаштириш қанчалик қийин бўлишини тасаввур қилишингиз мумкин. Аммо жамоамизда етакчилик хусусиятига эга футболчилар, яхши инсонлар бор. Энг муҳими ҳам шу.

Мен ҳамма қўрқадиган қаттиққўл инсонларни изламаяпман. Бизга яхши ва ижобий одамлар керак. Биргаликда Лео кетганидан кейин йўқотадиган жиҳатларимизни қоплашга ҳаракат қиламиз. Бу осон бўлмайди, аммо жамоамиз доимо қийин синовларни қабул қилиб келган.

Албатта, Мессисиз ҳамма нарса бошқача бўлади, аммо биз ечим топамиз. Леосиз ҳам яхши ўйинлар ўтказганмиз. Бизнинг футболимиз — тўпга эгалик қилиш ва ўйинни назорат қилишга асосланган. Ўйин услубимиз ўзгармайди, жамоанинг ўзига хослиги ҳам сақланиб қолади», — дея Скалонининг сўзларини All About Argentina келтирди.

Лионель Месси Аргентина терма жамоаси сафида 2005 йилдан буён тўп тепиб келган.