Ламин Ямалнинг ёшлар жамоасидаги собиқ мураббийи Иван Карраско «Барселона» вингерини айни пайтда дунёнинг энг яхши футболчиси деб атади. Шу билан бирга, у ёш футболчининг олдида ҳали узоқ фаолият борлиги ва кўп нарсани исботлаши кераклигини таъкидлади.

«Бу жуда яққол кўриниб турарди — унда ақл бовар қилмас табиий истеъдод бор эди. Ламин билан яқиндан ишлаган ҳар бир инсон унда жуда катта салоҳият ва табиий иқтидор борлигини биларди. Бунинг намоён бўлиши фақат вақт масаласи эди.

Мен учун у ҳозир дунёнинг энг яхши футболчиси. Менимча, биз ҳали унинг нималарга қодирлигини тўлиқ кўрганимиз йўқ. У ҳали жуда ёш ва исботлаши керак бўлган нарсалар кўп. Шунга қарамай, у 18 ёки 19 ёшидаёқ «Барселона»дек катта клуб ва Испания терма жамоасида етакчилик қилмоқда. Олдинда ҳали кўрадиган нарсаларимиз жуда кўп.

У Ла Лигани, Испания терма жамоаси билан эса жаҳон чемпионатидек энг муҳим мусобақани ютиб улгурган. Балки ўтган мавсумда чемпионатдаги статистикаси энг юқори даражада бўлмагандир, аммо у ҳали ҳам ўзини тўлиқ намоён қилиш босқичида. Бу мавсумдаги кўрсаткичлари эса ўтган йилгидан яхшироқ.

У самимий ва ростгўй. У жуда кучли характерга эга инсон. Ўзининг қандай истеъдод соҳиби эканини, дунёдаги энг кучли бир ёки икки футболчидан бири эканини билади ва бу ҳақда очиқ гапиради.

У Иньеста ёки Месси каби камтарлиги билан одамларга тез ёқадиган футболчилар тоифасига кирмайди. Аммо унинг табиати шунақа ва у ўзини табиий равишда шундай ифода этади», — деди Карраско.