Миллатлар лигаси 3-туридан ўрин олган Ирландия — Австрия (2:2) учрашуви вақтида мезбон жамоа мухлислари Фаластинни қўллаб-қувватловчи норозилик акцияларини ўтказди.
Учрашув кеча Дублиндаги «Авива» стадионида бўлиб ўтди. Биринчи бўлим давомида ўйин икки марта тўхтатилди. Норозилик акциялари старт ҳуштаги янграшидан олдин ҳам ўтказилган.
19-дақиқада «Бетис»нинг ирландиялик ҳужумчиси Трой Пэрротт ҳисобни очди. Шундан сўнг майдонга Фаластин байроқлари ва «Ўйинни тўхтатинг» деган ёзувлар туширилган теннис тўплари улоқтирилди. Бу акция Ирландия терма жамоасининг Исроилга қарши ўйинлар ўтказишига қарши норозилик сифатида ташкил этилди.
Нидерландиялик ҳакам Аллард Линдхут стюардлар тўпларни майдондан олиб ташлагунга қадар ўйинни қисқа муддатга тўхтатди.
35-дақиқада эса учрашув яна тўхтатилди. Бу сафар Фаластин байроғини кўтарган бир киши майдонга югуриб чиқди. Хавфсизлик хизмати ходимлари уни тезда ушлаб, чимга ётқизди.
