"ПСЖ" Португалиянинг "Брага" клубига ярим ҳимоячи Марио Доржелеснинг келажакдаги трансфери бўйича устувор ҳуқуқ учун 3,3 миллион евро тўлади. Бу ҳақда Foot Mercato хабар берди.

Келишув ҳақидаги маълумот "Брага"нинг молиявий ҳисоботи эълон қилинганидан сўнг маълум бўлди. Тўлов "устувор танлов ҳуқуқи" сифатида расмийлаштирилган.

Бу маблағ Доржелес келажакда албатта "ПСЖ"га ўтишини англатмайди. У фақат футболчи сотилиши мумкин бўлган тақдирда Париж клубига устувор мавқе беради.

Доржелес 2025 йил ёзида Даниянинг "Норшелланн" клубидан "Брага"га ўтган. Дебют мавсумида ярим ҳимоячи барча мусобақаларда 39 та ўйин ўтказиб, 7 та гол урди ва 4 та голли узатмани амалга оширди.

Аввалроқ Доржелесга "Арсенал", "Челси", "Ньюкасл" ва "Брайтон" ҳам қизиқиш билдиргани ҳақида хабарлар тарқалган эди.