Лионель Месси Аргентина терма жамоаси сафидаги хайрлашув учрашувини ўтказишга тайёргарлик кўрмоқда. "Альбиселесте"нинг рақиби Бенин терма жамоаси бўлади.
The Touchline хабарига кўра, Мессининг халқаро фаолиятидаги сўнгги ўйин атрофида можароли вазият юзага келган. Бенин терма жамоаси мезбон томон тақдим этган шароитлардан норозилик билдирмоқда.
Бенин томонининг шикоятлари орасида эконом-классда учиш, яшаш шароитларининг ёмонлиги, тўлиқ жиҳозланган тренажёр зали йўқлиги, меҳмонхонанинг бир қаватида иссиқ сув бўлмаслиги ва ҳатто саунанинг ишламаслиги ҳам бор.
Шунингдек, Аргентина футбол ассоциацияси ўртоқлик учрашувлари учун харажатларни камайтириш ва даромадни ошириш мақсадида атайин кичик Африка терма жамоаларини рақиб сифатида танлаётгани ҳақида гап-сўзлар тарқалган.
"Бенин терма жамоасидан савол: "Мессининг бу улкан хайрлашув учрашувидан тушадиган барча пул кимнинг чўнтагига кетяпти?"" — деб ёзади The Touchline.
Аргентина — Бенин учрашуви 7 октябрь куни Ўзбекистон вақти билан соат 04:00 да бошланади.
Лионель Месси Аргентина терма жамоаси билан Жаҳон чемпионати, икки марта Америка кубоги ва Финалиссима ғолиблигини қўлга киритган.
