«Монако» бюджет тақчиллигини қоплаш учун умумий қиймати 100 миллион евро бўлган футболчиларни сотишга мажбур. Клуб эгаси, россиялик тадбиркор Дмитрий Риболовлев сўнгги икки йил давомида жамоани ривожлантириш ва уни сақлаб туриш учун шахсий маблағларини сарфламаяпти.
L'Equipe маълумотига кўра, Риболовлев 2024 йилда «Монако»ни сотиш мақсадида эҳтимолий харидорларни излашни бошлаган. Бироқ 2025 йилда бу жараён тўхтатилган.
Риболовлев ҳанузгача «Монако»нинг молиявий фаолияти ҳақидаги ҳисоботларни олиб туради, аммо клубга маблағ ажратмайди. У жамоани 300 миллион евро деб баҳолаган.
Бюджетни барқарор даражада ушлаб туриш учун «Монако» футболчиларни сотиш орқали 100 миллион евро даромад олиши керак. Аввалроқ клуб Манес Аклиушни ПСЖга сотган, шунингдек, Александр Головиннинг трансфери бўйича «Зенит» ва Москвадаги «Спартак» билан келишувга эришишга уринган. Бироқ россиялик футболчи жамоада қолишни афзал кўрган.
