Миланнинг «Интер» клуби Италия А Сериясидаги мағлубиятсиз сериясини давом эттирмоқда.
Кристиан Киву бошчилигидаги жамоа чемпионатнинг 6-туридан ўрин олган учрашувда «Парма»ни 3:0 ҳисобида тор-мор этди.
Шу тариқа, миланликлар жорий мавсум А Серияда ўтказган дастлабки олтита учрашувида бирор марта ҳам мағлубиятга учрамади. «Интер» ушбу баҳсларнинг бештасида ғалаба қозонган бўлса, яна бир ўйинда дуранг қайд этди.
Айни пайтда «нерадзурри» 16 очко билан Италия чемпионати турнир жадвалида пешқадамлик қилмоқда. Милан клуби энг яқин таъқибчилари — «Рома» ва «Лацио»дан 3 очкога ўзиб кетган.
Шу билан бирга, Римнинг ҳар икки клуби захирасида биттадан ўйин мавжуд.
