АҚШнинг МЛС чемпионати доирасида «Интер Майами» ўз майдонида «Ди-Си Юнайтед»ни қабул қилди. Форт-Лодердейлдаги «Ди-Эр-Ви Пи-Эн-Ка Стэдиум» стадионида ўтган учрашув мезбонларнинг 4:0 ҳисобидаги ғалабаси билан якунланди.

Ғолиблар сафида уругвайлик ҳужумчи Луис Суарес ва аргентиналик форвард Лионель Месси иккитадан гол уришди.

Суарес учрашувнинг 3-дақиқасида ҳисобни очди. 39-дақиқада эса у дублни расмийлаштириб, «Интер Майами»нинг устунлигини оширди.

Иккинчи бўлим бошланганидан кўп ўтмай, 47-дақиқада Месси рақиб дарвозасини ишғол қилди. 60-дақиқада аргентиналик юлдуз иккинчи голини уриб, учрашувдаги якуний ҳисобни ўрнатди — 4:0.

Шу тариқа, «Интер Майами» МЛСдаги ғалабасиз сериясини тўхтади. Бунгача жамоа кетма-кет бешта учрашувда ғалаба қозона олмаган: тўрт марта дуранг ўйнаган ва бир бор мағлуб бўлган.

«Ди-Си Юнайтед» эса сўнгги учта учрашувда иккинчи мағлубиятини қабул қилди.

Кейинги турда «Интер Майами» «Нью-Йорк Сити» билан, «Ди-Си Юнайтед» эса «Нью-Йорк Ред Буллз»га қарши баҳс олиб боради.

АҚШ. МЛС
«Интер Майами» — «Ди-Си Юнайтед» — 4:0
Голлар: Луис Суарес (3, 39), Лионель Месси (47, 60).