«Манчестер Юнайтед»нинг собиқ ҳимоячиси Гари Невилл жамоанинг ярим ҳимоя чизиғидаги муаммоларга эътибор қаратди.

Англия Премьер-лигасининг сўнгги турида манчестерликлар «Тоттенхэм» билан 1:1 ҳисобида дуранг ўйнади. Мазкур баҳсдан сўнг Невилл ўз подкастида Юри Тилеманс ва Кобби Майну жуфтлигининг ҳаракатларини танқид қилди.

«Менимча, биз Тилеманс ва Майну жуфтлигини етарлича кузатдик. Бу жуфтликдан бутунлай воз кечиш керак, демоқчи эмасман. Чунки бундай хулоса ҳаддан ташқари кескин бўларди.

Бироқ кўрганларимиз шуни айтиш учун етарли: жамоанинг ярим ҳимоя чизиғида Англия Премьер-лигаси даражасидаги клубга хос динамика етишмаяпти.

Фикримча, уларнинг ҳар иккиси ҳам алоҳида олганда яхши футболчи. Лекин баъзида ўйинчилар бир-бири билан кутилган даражада уйғунлаша олмайди ёки уларнинг ўйин услублари ўзаро мос келмайди», — деди Невилл.

Англиялик мутахассис «Тоттенхэм»га қарши учрашувда Карлос Балебанинг захирадан майдонга тушиши жамоа ўйинига ижобий таъсир кўрсатганини ҳам таъкидлади.

«Балеба Майну билан бирга майдонда ҳаракат қила бошлаганидан кейин жамоанинг ўйинида энергия анча ошгандек туюлди.

Ярим ҳимоя чизиғида ниманидир ўзгартиришга тўғри келади. Қолган футболчилар ҳам ўзларини қўлга олишлари керак. Чунки олдинда уларни Диего Симеоне бошқараётган «Атлетико» ҳамда «Элланд Роуд» стадионида «Лидс»га қарши учрашувлар кутмоқда», — дея қўшимча қилди у.

Қайд этиш жоиз, «Манчестер Юнайтед» «Тоттенхэм» билан дурангдан сўнг Англия Премьер-лигаси турнир жадвалида 12-ўринни эгаллаб турибди.