Таниқли италиялик мураббий Антонио Конте «Барселона»нинг ёш истеъдоди ҳақида илиқ фикрлар билдирди.
Ҳозирда ишсиз бўлган мутахассис жорий мавсумда «кўк-анорранглилар»нинг асосий таркибидан жой олган 19 ёшли чап қанот ҳимоячиси Хави Эспартнинг ўйинига юқори баҳо берди.
«Мен «Барселона»нинг ўйинини томоша қилдим ва аввал исмини ҳеч қачон эшитмаган чап қанот ҳимоячисини кўрдим. Шарҳловчи ўтган мавсумда у атиги тўрт марта майдонга тушиб, ҳар сафар ўн дақиқадан ўйнаганини ёки шунга ўхшаш ҳолат бўлганини айтди. Ёзда эса уни ижарага беришни режалаштиришган. Аммо ҳозир у асосий таркибда майдонга тушиб, ўзини шундай осонлик билан намоён этмоқда», — дея Конте сўзларини келтиради BarcaTimes.
Хави Эспарт жорий мавсумда каталонияликлар сафида олтита учрашувда иштирок этиб, бир гол ва иккита голли узатмани ўз ҳисобига ёзди.
