Англия Премьер-лигасининг 6-туридан ўрин олган марказий учрашувда "Манчестер Сити" сафарда "Ливерпуль"ни 3:0 ҳисобида йирик мағлубиятга учратди. Британиялик таниқли журналист Пирс Морган ушбу натижага муносабат билдириб, Манчестер клубини кескин танқид қилди.
"Бу шунчаки масхарабозлик. "Манчестер Сити" футболчилари ва мухлислари гўё ҳеч нарса бўлмагандек ғалабани катта хурсандчилик билан нишонламоқда. Ваҳоланки, клуб футбол оламидаги энг катта фирибгар сифатида фош этилди. Агар улар бу мавсумда чемпионликни қўлга киритса, бу Англия Премьер-лигасини барбод қилиши мумкин", — деб ёзди Морган ижтимоий тармоқдаги саҳифасида.
Аввалроқ "Манчестер Сити" кўплаб молиявий қоидабузарликларда айбдор деб топилгани ҳақида хабарлар тарқалган эди.
Англия Премьер-лигасида олтита тур ортда қолганидан сўнг, "шаҳарликлар" 18 очко жамғариб, мусобақа жадвалида пешқадамлик қилмоқда.
