«Манчестер Юнайтед» раҳбарияти жамоанинг қониқарсиз натижалари фонида бош мураббий Майкл Каррикни истеъфога чиқариб, унинг ўрнига Антонио Контени тайинлаш имкониятини жиддий кўриб чиқмоқда. Бу ҳақда Италиянинг Calciomercato нашри хабар берди.

Манчестерликлар Англия Премьер-лигасининг дастлабки олтита учрашувида атиги битта ғалаба қозонди. Шунингдек, жамоа Англия Лига кубогида «Брайтон»га мағлуб бўлиб, мусобақани тарк этди.

Манбага кўра, клуб раҳбарияти юзага келган вазиятдан чиқиш йўлларини изламоқда ва асосий номзодлардан бири сифатида Антонио Контени кўриб чиқмоқда.

57 ёшли италиялик мутахассис ўтган мавсум якунида «Наполи»ни тарк этганидан буён ишсиз юрибди. Хабар қилинишича, у «Манчестер Юнайтед»дан таклиф тушса, уни мамнуният билан қабул қилишга тайёр.

Италиялик журналист Энцо Буккьонининг ёзишича, Конте «Манчестер Юнайтед» билан келишувга эришиш арафасида турибди.

Бироқ Англия ОАВ тарқатаётган маълумотлар бундан фарқ қилади. Уларнинг хабар беришича, манчестерликлар раҳбарияти ҳозирча Майкл Каррикни истеъфога чиқаришни режалаштирмаяпти.

Маълумот учун, Антонио Конте Англия футболини яхши билади. У 2016/17 йилги мавсумда «Челси»ни Премьер-лига чемпионлигига олиб чиққан. Шунингдек, италиялик мутахассис 2021 йил ноябридан 2023 йил мартига қадар «Тоттенхэм»ни бошқарган.

Ҳозирча «Манчестер Юнайтед» томонидан эҳтимолий мураббийлар алмашинуви юзасидан расмий баёнот берилмаган.