Германия терма жамоаси бош мураббийи Юрген Клопп «Ливерпуль» раҳбариятига Флориан Вирцни сотиб олмасликни маслаҳат берганини маълум қилди.
Немис мутахассиси аввалроқ «Ливерпуль»ни бошқарган. Вирц эса 2025 йил ёзида Леверкузеннинг «Байер» клубидан мерсисайдликлар сафига қўшилган эди.
Клоппнинг таъкидлашича, у футболчининг Англия Премьер-лигасига мослашиши қийин кечишини олдиндан тахмин қилган.
«Улар Вирцни сотиб олмоқчи эканини эшитганимда, қўнғироқ қилиб, Бундеслига билан Премьер-лига ўртасида катта фарқ борлигини айтдим. Уни трансфер қилмасликни маслаҳат бердим, аммо улар ўз қарорларида қатъий туриб, барибир Леверкузендан сотиб олишди.
Гап Вирцнинг ёмон футболчи эканида эмас. Аммо мен унинг «Байер»даги ўйинларини кузатганимдаёқ, Премьер-лигада муваффақият қозониши қийин бўлишини билардим. Чунки Англия чемпионатидаги ўйин шиддати бутунлай бошқача.
Улар буни тан олишмайди, аммо ҳозир Вирц учун шунчалик катта маблағ сарфлаганидан афсусланишмоқда. Агар менинг маслаҳатимга қулоқ солишганида, бундай ҳолат юзага келмасди», — дея Клоппнинг сўзларини FullTime Report ижтимоий тармоқда келтирди.
Шу тариқа, Клопп «Ливерпуль» раҳбарияти Вирц трансфери борасида унинг огоҳлантиришига қарамай, футболчини сотиб олишга қарор қилганини таъкидлади.
