Португалия миллий терма жамоасининг собиқ ҳимоячиси Пепе мамлакат Футбол федерацияси (FPF) жамғармаси бошқарув кенгаши аъзоси этиб тайинланди. Бу ҳақда ташкилот матбуот хизмати расман маълум қилди.

Футболчилик фаолиятини якунлаган португалиялик собиқ ҳимоячи янги лавозимга тайинланганидан мамнун эканини билдириб, ўз тажрибаси орқали жамғарма фаолиятига ҳисса қўшиш ниятида эканини таъкидлади.

«Ўзимга яқин деб билган ва қадриятларини қўллаб-қувватлайдиган ушбу жамғармадан таклиф олиш мен учун катта шараф бўлди.

Умид қиламанки, фаолиятим орқали фойда келтира оламан, кўплаб инсонларнинг юзига табассум улашаман ва федерация қадриятларини кенг тарғиб қилишга ҳисса қўшаман», — деди Пепе.

Маълумот учун, Пепе 2024 йил август ойида профессионал футболчилик фаолиятини якунлаган.

У 2007–2017 йиллар давомида Мадриднинг «Реал» клуби шарафини ҳимоя қилиб, Испания жамоаси сафида 334 та учрашув ўтказган ва 14 та совринни қўлга киритган.

Улар орасида УЕФА Чемпионлар лигасидаги учта чемпионлик ва Испания Ла Лигасидаги учта ғолиблик ҳам бор.

Шунингдек, Пепе Португалия миллий терма жамоаси таркибида 2016 йилги Европа чемпионати ғолиби бўлган. 2019 йилда эса УЕФА Миллатлар лигасининг илк мавсумида чемпионликни қўлга киритган.

Эндиликда собиқ ҳимоячи Португалия футболи ривожига майдон ташқарисида ҳисса қўшишни давом эттиради.