Журналист Хавьер Бош Чемпионлар лигасида «Галатасарой»га қарши ўйинда «Барселона» ҳужумчиси Ламин Ямалнинг намойиш этган ўйини ҳақида ўз фикрларини билдирди.

Умумий босқичнинг иккинчи турида бўлиб ўтган учрашувда «Барселона» 4:1 ҳисобида иродали ғалабага эришди. Ямаль майдонда тўлиқ 90 дақиқа ҳаракат қилди ва иккита голли узатмани амалга оширди.

«Ламин Ямаль ўйинни тўлиқ назоратига олди. «Галатасарой» ҳисобни очди, стадиондаги муҳит эса ақл бовар қилмас даражада эди. «Барселона»га қийин бўлди. Аммо кейин Ламин ўйин ўз сценарийси бўйича кечиши керак, деган қарорга келди. Иккита голли узатма, яна бир голда иштирок этиш ва кўплаб хавфли вазиятлар яратиш — у учрашувнинг энг яхши футболчиси бўлди», — деб ёзди журналист Mundo Deportivo нашридаги мақоласида.

Ямаль жорий мавсумда ўнта учрашувда саккизта гол уриб, тўққизта голли узатмани амалга оширди.