Италиянинг «Интер» клуби бош мураббийи Кристиан Киву Чемпионлар лигаси умумий босқичининг иккинчи тури доирасида Бельгиянинг «Брюгге» жамоасига қарши ўтган ва 3:4 ҳисобидаги мағлубият билан якунланган учрашув ҳақида гапирди.
«Брюгге» сафида Николо Трезольди учта гол урди, улардан бири пенальтидан киритилди. Ромео Верман ҳам рақиб дарвозасини ишғол қилди. «Интер» таркибида эса Лаутаро Мартинес икки марта гол урди, Анж-Йоан Бонни яна бир тўп киритди.
«Қарши ҳужумда гол ўтказиб юбордик, кейин ҳисобни тенглаштирдик. Иккинчи голни ўтказиб юборганимиздан сўнг, ҳимоямиз ортида жуда кўп бўшлиқ қолдира бошладик. Биз ғалаба қозонишни истадик, аммо рақибга ҳаддан ташқари кўп бўш ҳудуд бериб қўйдик. Чемпионлар лигасида бундай қилиш мумкин эмас.
Мақсадларимиз ўзгармаган, олдинда яна олтита учрашув бор. Аммо мағлубиятлар оғриқли бўлади. Биз кўп меҳнат қилишимиз ва камчиликларимизни тузатишимиз керак», — дея Кивунинг сўзларини УЕФА расмий сайти келтирмоқда.
