Италиянинг «Комо» клуби ярим ҳимоячиси Максимо Перроне жамоа билан шартномасини 2031 йилгача узайтиришга яқин турибди.

Бу ҳақда Италия А Сериясига ихтисослашган инсайдер Николо Скира хабар бермоқда.

Аргентиналик таянч ярим ҳимоячисининг амалдаги шартномаси 2029 йилда ўз ниҳоясига етади. Перроне сўнгги йилларда «Комо»нинг юксалишида муҳим роль ўйнаб келмоқда.

Ўтган мавсумда у барча мусобақалар доирасида 41 та учрашувда майдонга тушиб, 3 та гол урди ва 4 та голли узатмани амалга оширди. Шу тариқа, футболчи Сеск Фабрегас бошқараётган жамоанинг Чемпионлар лигасига йўлланма олишига ҳисса қўшди.

Жорий мавсумда эса Перроне ҳозирга қадар 7 та учрашувда иштирок этган.

«Комо» 23 ёшли футболчи учун Италиянинг етакчи клубларидан келиб тушган бир нечта таклифни рад этган. Клуб Перронени сотилмайдиган футболчилардан бири деб ҳисобламоқда.

Шунингдек, «Манчестер Сити» футболчининг келгусидаги трансферидан тушадиган маблағнинг 30 фоизини олиш ҳуқуқини сақлаб қолган.