Мадриднинг «Реал» клуби ярим ҳимоячиси Орельен Тчуамени УЕФА Чемпионлар лигасида «Рома»га қарши учрашув олдидан жамоага қаратилган танқидларга муносабат билдирди.

Франциялик футболчи бундай вазиятда хотиржамликни сақлаш ва жамоавий ўйинни яхшилашга эътибор қаратиш муҳимлигини таъкидлади.

«Биз яхши биламизки, «Реал»да ўйнасанг, танқидлар ҳамиша бўлади. Энг муҳими — хотиржамликни сақлаш ва жамоа сифатида ўйинимизни яхшилашга ҳаракат қилиш.

Албатта, биз кўп жиҳатдан яхшироқ ҳаракат қила оламиз. Бунинг учун ҳар куни тинимсиз ишлаяпмиз», — деди Тчуамени.

Франция терма жамоаси аъзоси кийиниш хонасидаги ижобий муҳитни ҳам алоҳида таъкидлаб, Ян Диоманденинг жамоага қўшилганини мамнуният билан қарши олди.

«Майдонда ҳам, кундалик ҳаётда ҳам кўриб турганим — жамоамизда ажойиб муҳит шаклланган.

Ҳар бир футболчи жамоага имкон қадар кўпроқ ёрдам беришга интилмоқда. Яннинг трансфери эса бизни янада кучайтиради», — дея таъкидлади у.

Чуамени жамоадаги бирдамлик жорий мавсумда белгиланган мақсадларга эришишга хизмат қилиши кераклигини ҳам қайд этди.

«Бу йил совринларни қўлга киритиш учун барчамиз бор кучимизни ишга соламиз», — деди футболчи.