ФИФА тўғридан-тўғри қизил карточка олган футболчиларга нисбатан қўлланадиган бир ўйинлик автоматик дисквалификацияни тўхтатиб туришни тақиқлашни режалаштирмоқда. Бу ҳақда The Telegraph нашри хабар берди.
Ушбу таклиф 2026 йилги Жаҳон чемпионати вақтида АҚШ терма жамоаси ҳужумчиси Фоларин Балогун билан боғлиқ юзага келган можародан кейин илгари сурилган. Футболчи мусобақа давомида қизил карточка олганига қарамай, дарҳол дисквалификация қилинмаган эди.
Қоидаларга киритилиши таклиф этилаётган ўзгартиш 15 октябрь, пайшанба куни Цюрихда бўлиб ўтадиган ФИФА кенгаши йиғилишида кўриб чиқилиши режалаштирилган. Қизиғи, икки ҳафта аввал эълон қилинган кун тартибида фақат интизомий тартиб-таомилларни қайта кўриб чиқиш масаласи бор эди.
Таклиф маъқулланса, тўғридан-тўғри қизил карточка учун белгиланган бир ўйинлик автоматик дисквалификацияни тўхтатиб туриш мумкин бўлмайди. Бироқ узоқроқ муддатли дисквалификацияларни тўхтатиб туриш имконияти сақланиб қолади.
Эслатиб ўтамиз, ФИФА аввалроқ Португалия терма жамоаси ҳужумчиси Криштиану Роналдунинг Жаҳон чемпионати саралаш босқичида Ирландияга қарши ўйинда четлатилганидан кейинги жазосини юмшатган эди.
