Мадриднинг «Реал» клуби ҳужумчиси Килиан Мбаппе Европа Чемпионлар лигаси тарихидаги энг яхши тўпурарлар бешталигига кирди. Бу ҳақда Transfermarkt портали статистик маълумотларида қайд этилган.
Франциялик футболчи Чемпионлар лигаси умумий босқичининг 2-туридан ўрин олган «Рома»га қарши учрашувнинг 25-дақиқасида рақиб дарвозасини ишғол қилди. Шу тариқа, Мбаппе ушбу мусобақадаги голлари сонини 72 тага етказди.
Эътиборлиси, бу баҳс ҳужумчи учун Чемпионлар лигасидаги 100-учрашув бўлди.
Мбаппе мазкур натижа орқали «Реал»нинг собиқ ҳужумчиси, испаниялик афсонавий футболчи Раулни ортда қолдирди. Раул Чемпионлар лигасида 142 та ўйин ўтказиб, 71 та гол урган.
Айни пайтда Чемпионлар лигаси тарихидаги энг яхши тўпурарлар рўйхатида Мбаппедан фақат тўрт нафар футболчи олдинда бормоқда.
Улар қуйидагилар:
-
Криштиану Роналду — 140 та гол (183 та ўйин).
-
Лионель Месси — 129 та гол (163 та ўйин).
-
Роберт Левандовски — 109 та гол (144 та ўйин).
-
Карим Бензема — 90 та гол (152 та ўйин).
-
Килиан Мбаппе — 72 та гол (100 та ўйин).
