Мадриднинг "Реал" клуби бразилиялик ҳужумчиси Винисиус Жуниор Европа Чемпионлар лигаси умумий босқичининг 2-туридан ўрин олган "Рома"га қарши учрашувда алмаштирилганидан нима учун норози бўлганини тушунтирди.

Футболчининг таъкидлашича, у ҳар бир баҳсда имкон қадар кўпроқ майдонда бўлишни ва жамоасига ёрдам беришни истайди. Шу билан бирга, Винисиус захирадан майдонга тушган Эндрикнинг ҳаракатларига юқори баҳо берди.

"Алмаштирилганимдан норози бўлишим табиий ҳолат эди. Мен барча учрашувларни тўлиқ ўтказишни ва жамоамга ёрдам беришни хоҳлайман. Аммо бунинг ҳар доим ҳам имкони бўлавермайди.

Эндрик майдонга тушиб, ўйиннинг боришини ўзгартирди. У иккинчи бўлимдаги энг яхши футболчи бўлди", — дея Винисиуснинг сўзларини келтиради журналист Фабрицио Романо.

Эслатиб ўтамиз, Чемпионлар лигаси умумий босқичининг 2-турида "Реал" сафарда "Рома"ни 4:3 ҳисобида мағлуб этди. Мадридликлар учрашув давомида 1:3 ҳисобида ортда бораётганига қарамай, якунда иродали ғалабани қўлга киритди.

Винисиус мазкур баҳсда 59 дақиқа ҳаракат қилди ва гол ёки голли узатма билан ажралиб тура олмади.

Жорий мавсумда бразилиялик футболчи "Реал" сафида барча мусобақалар доирасида 10 та учрашув ўтказиб, битта гол урган.